പരിയാരം മെഡിക്കല്‍ കോളജിൽ ഡിസംബര്‍ ഒന്നു മുതല്‍ പാര്‍ക്കിങ് ഫീസ്
കണ്ണൂർ : ഇതര സര്‍ക്കാര്‍ മെഡിക്കല്‍ കോളജുകളിലേതുപോലെ കണ്ണൂര്‍ ഗവ. മെഡിക്കല്‍ കോളജ് കോംപൗണ്ടിലും വാഹനങ്ങള്‍ക്ക് പാര്‍ക്കിങ് ഫീസ് ഏര്‍പ്പെടുത്തി തീരുമാനമായി. ഇതനുസരിച്ച് സര്‍ക്കാര്‍-അര്‍ധസര്‍ക്കാര്‍-പൊതുമേഖലാ സ്ഥാപനങ്ങളുടെ വാഹനങ്ങള്‍, ഔദ്യോഗിക മാധ്യമങ്ങളുടെ വാഹനങ്ങള്‍, കണ്ണൂര്‍ ഗവ. മെഡിക്കല്‍ കോളജിന് കീഴില്‍ വരുന്ന സ്ഥാപനങ്ങളിലെ ജീവനക്കാരുടേയും വിദ്യാര്‍ഥികളുടേയും വാഹനങ്ങള്‍ ഒഴികെയുള്ള എല്ലാ വാഹങ്ങള്‍ക്കും പാര്‍ക്കിങ് ഫീസ് ബാധകമായിരിക്കും. നാലുചക്ര വാഹനങ്ങള്‍ക്ക് 20 രൂപയും മുച്ചക്ര വാഹനങ്ങള്‍ക്ക് 10 രൂപയും ഇരു ചക്രവാഹനങ്ങള്‍ക്ക് 5 രൂപയുമാണ് ഫീസ്. നാലുമണിക്കൂര്‍ നേരത്തേക്ക് കണക്കാക്കിയാണ് ഈ ഫീസ് നിശ്ചയിച്ചിരിക്കുന്നത്. പാര്‍ക്കിങ് ഫീസ് ഇളവു ചെയ്ത മേല്‍ സൂചിപ്പിച്ച വാഹനങ്ങളില്‍ ആയത് തെളിയിക്കുന്ന ഔദ്യോഗിക മുദ്ര പതിച്ചിരിക്കണം.
പാര്‍ക്കിങ് ഫീസ് ഇനത്തില്‍ ലഭിക്കുന്ന തുക ജില്ലാ കലക്ടര്‍ ചെയര്‍മാനായ ആശുപത്രി വികസന സമിതിക്ക് കീഴില്‍ അതത് ദിവസം അടക്കുന്ന രീതിയിലാണ് നിശ്ചയിച്ചിരിക്കുന്നത്. ഈ തുക ആശുപത്രിയിലെത്തുന്ന പാവപ്പെട്ട രോഗികള്‍ക്കു വേണ്ടിയാണ് വിനിയോഗിക്കുക. മെഡിക്കല്‍ കോളജിലെത്തുന്ന വാഹനങ്ങള്‍ സംബന്ധിച്ചുള്ള കണക്കെടുപ്പിന്റെ കൂടി ഭാഗമായാണ് പാര്‍ക്കിങ് ഫീസ് സംമ്പ്രദായം ഏര്‍പ്പെടുത്തിയത്. കണ്ണൂര്‍ കുടുംബശ്രീ മിഷനുമായി ചേര്‍ന്നാണ് മെഡിക്കല്‍ കോളജിലെ പാര്‍ക്കിങ് സംമ്പ്രദായം ചിട്ടപ്പെടുത്തുന്നത്. ഡിസംബര്‍ 1 മുതല്‍ പാര്‍ക്കിങ് ഫീസ് നടപ്പിലാക്കാന്‍ കുടുംബശ്രീ മിഷന്‍ ഭാരവാഹികള്‍ ഉള്‍പ്പടെ പങ്കെടുത്ത് മെഡിക്കല്‍ കോളജില്‍ നടന്ന യോഗത്തില്‍ തീരുമാനമായതായും അതിന് ആശുപത്രി വികസന സൊസൈറ്റി യോഗം അംഗീകാരം നല്‍കിയതായും പ്രിന്‍സിപ്പാള്‍ ഡോ. കെ.അജയകുമാര്‍ അറിയിച്ചു.
Comments
Post a Comment